“Gazini bos, Jamshid” filmining taqdimotidan: “‘Avatar’ga ham shuncha odam tushmagan”

5 fevral, yakshanba kuni Alisher Navoiy nomli kinosaroyda yosh rejissyor Sur’at Islomovning “Gazini bos, Jamshid” deb nomlangan kinokomediyasi taqdimoti bo‘lib o‘tdi. 

Film taklifnomasida “Xoynahoy yakshanba oqshomida do‘stlar bilan ko‘rishib, maza qilib kulishib, kayfiyatingizni ko‘tarishni reja qilgandirsiz, unda sizni 5 fevral soat 18:00 da taqdimoti bo‘lib o‘tadigan ‘Gazini bos, Jamshid’ komediyasida kutamiz” deb yozilgan edi. Aytib o‘tish joizki, film ijodkorlari taqdimot marosimiga tashrif buyurgan tomoshabinlarni miriqib kuldirishga muvaffaq bo‘lishdi.

Taqdimot marosimiga shunchalik ko‘p tomoshabin kelganidan, ko‘pchilikka joy yetmay qoldi. Biroq shunga qaramay, hech kimni zalni tark etmadi va tik oyoqda filmni tomosha qildi.

Taqdimot marosimi noodatiy tarzda boshlandi. Boshlovchilar ya’ni “MarkaZ” guruhi xonandalari film boshlangunga qadar tomoshabinlarga yaxshi kayfiyat ulashib turdi. Sahnaga bir necha xavaskor ijodkorlar taklif etilib, ular o‘z iste’dodini namoyish etdi. Shundan so‘ng xonanda Shuhrat Umar sahnada qo‘shiq ijro etdi. Taqdimotda bir nechta qiziqarli o‘yinlar ham o‘tkazildi. Film ijodkorlari tanishtirilgach, “Gazini bos, Jamshid” filmi namoyish etildi.

Kartinada bosh rollarni Sur’at Islomov va komik aktyor Baxtiyor Turg‘unovlar mahorat bilan ijro etgan.

Film voqealari talaba Jasurning homilador rafiqasining yoniga Samarqandga shoshilayotgani bilan boshlanadi. Jasur Jamshid ismli xazilkash va quvnoq haydovchi bilan tanishadi. Ular Samarqandga yetib borgunicha bir olam qiziqarli sarguzashtlarni boshdan kechiradi...

“Gazini bos, Jamshid” komediyasini tomosha qilar ekansiz, voqealar rivojidan zerikmaysiz. Aksincha, “Endi nima bo‘larkin?” deb kutasiz. Bu esa film ssenariysi va rejissurasi kuchli ekanligidan dalolat beradi. 

Film taqdimot marosimi tugagach, tomoshabinlardan birining “ ‘Avatar’ga ham buncha ko‘p odam tushmagan bo‘lsa kerak”, degan xazili quloqqa chalindi. “Avatar”ni bilmadik-u, ammo yaqin kunlar ichida taqdim etilgan o‘zbek filmlarining birontasida shunchalik ko‘p tomoshabinni uchratmagan edik.

Film ijodkorlari:

Ssenariy mualliflari: Solih Solihov, Sur’at Islomov, postanovkachi rejissyor: Sur’at Islomov, postanovkachi operator: Baxtiyor Nabiev, bastakor: Baxtiyor Otaxonov, prodyuserlar: Erkin Karimov, Sur’at Islomov.