Hind aktrisasi Shridevi 54 yoshida vafot etdi

Hindistonlik kinoaktrisa Shridevi (haqiqiy ismi Shri Amma Yanger Ayyapan) 24-fevralga o‘tar kechasi Dubayda yurak xurujidan vafot etdi, deb yozadi “TASS” NDTV telekanaliga tayanib. Aktrisa 54 yoshda edi.

Telekanal ma’lumotlariga ko‘ra, Shridevi Dubayga jiyanining to‘yida qatnashish uchun borgan.

Shridevi hind kinosining eng mashhur yulduzlaridan biri hisoblanadi, u Mumbaydagi Bollivud studiyalarida ham, Janubiy Hindiston kinosida ham suratga tushgan. Aktrisa jami 270 da kartinada rol o‘ynagan.

O‘zbek tomoshabinlari Shridevini “Artist” (1983), “Mehribonginam” (1987), “Janob Hindiston” (1987) filmlari orqali yaxshi taniydi.

Aktrisaning vafoti munosabati bilan Hindiston bosh vaziri Narendra Modi va prezident Ram Natx Kovind ta’ziya bildirdi.