Messi bunday bo‘lganidan hayratda

Argentinalik futbolchi kelishuv amalga oshadi deb o‘ylagandi va yangi shartnomaga imzo chekishiga ishongandi. Futbolchi hatto «Barselona» uni ro‘yxatdan o‘tkazishi uchun maoshini keskin pasaytirishga ham tayyor edi, deb yozmoqda ispan nashrlari.

Leo Messi payshanba kuni hamma ish yopilishini va juma kunidan mashg‘ulotlarga kirishib, yangi mavsumni boshlash uchun jamoadoshlari bilan uchrashishni niyat qilgandi.

Hujumchining otasi Xorxe Messi Kataloniyaga «Barselona» bilan yangi shartnomaga imzo chekish uchun borgan edi. Messi va uning otasi moliyaviy shartlar to‘liq kelishilgani sabab faqat «Barselona» direktorlar kengashi bilan kelishuv rasman e’lon qilinishini yakunlash qolgan deb o‘ylashayotgandi.

Ammo klub prezidenti Laporta uchrashuv vaqtida Xorxe Messiga juda afsusda ekanini aytib, La Liga tomonidan belgilangan moliyaviy taqiqlar tufayli klub argentinalik futbolchini ro‘yxatdan o‘tkaza olmaganini bildiradi.

Shundan keyin ham Messining oilasi klub prezidentiga futbolchi maoshini yanada pasaytirishga tayyorligi haqida bildirgan.

Biroq «Barselona» Messining oilasi bilan bog‘lanib, ularga La Liganing moliyaviy chegarasini yengib o‘tishning imkoni yo‘qligini va shuning uchun futbolchini reglament bo‘yicha ro‘yxatdan o‘tkazish ilojsiz ekanini aytdi.

Messining oilasiga yaqin manbalar hujumchi hozircha boshqa biror klub bilan rasman muzokara qilmaganini aytishmoqda, chunki u amaldagi klubi bilan shartnomani uzaytirish mumkinligiga ishongan. Shu sabab yuzaga kelgan vaziyatdan Messi hayratda qolmoqda.