Moskvada 3 o‘zbekistonlik ishchi gazdan zaharlanib, vafot etishdi

22 iyun kuni Moskva shahrining Bojenko ko‘chasidagi kanalizatsiya quduqlaridan birida ish olib borayotgan 5 nafar ishchi gazdan zaharlanishdi. Oqibatda 3 kishi hayotdan ko‘z yumdi. Bu haqda “Moskovskiy Komsomoles” nashri xabar bermoqda.

Aniqlanishicha, 22 iyun kuni soat taxminan 16:00 da ishchilarning bari quduq ichiga tushishgan. Ular texnika xavfsizligi qoidalarini buzishgan, havo yetkazuvchi maskalardan foydalanishmagan.

Odatda kanalizatsiya lyuklarida metan to‘planib qoladi. Bu gazning hidi bo‘lmasa-da, ammo insonni zaharlaydi.

5 ishchi tushgan quduqda ham metan miqdori ko‘p bo‘lgan, natijada ular birin-ketin hushlarini yo‘qota boshlashgan.

Favqulodda vaziyatlar xizmati qutqaruvchilari yetib kelguniga qadar boshqa ishchilar 3 nafar sherigining jasadlarini quduqdan olib chiqishgan.

Eng achinarlisi shuki, qurbonlar O‘zbekiston fuqarolari bo‘lishgan.

Durdona Rasulova